Улиран одож буй 2009 он баяртай гээд угтан ирж байгаа 2010 онтойгоо сайн байна уу гэж мэндчилье. Айл хотлоороо өнгөрсөн оны алдаа оноогоо дэнслэн ярилцаж ирэх оны ажил үйлсээ төлөвлөн байгаа энэ цагт аймаг орон нутаг салбар салбарын шилдгүүдээ шалгаруулжээ. Шилдэг менежер, шилдэг төрийн тусгай албан хаагч, шилдэг төрийн захиргааны албан хаагч, шилдэг хүмүүнлэгийн үйлстэн, нийгмийн салбарын шилдэг албан хаагч нар тодорч 2009 оны 12-р сарын 31 -ний үдэш өргөмжлөлөө гардсан юм.

Он солигдох мөчид Дорнод аймгийн хэмжээнд хүн амины хэд хэдэн ноцтой хэрэг гарлаа. 2010 оны нэгдүгээр сарын 1-нээс 2 нд шилжих шөнө Хэрлэн сумын 9 дүгээр багийн нутаг дэвсгэрт иргэн А-г нөхөр нь гэр бүлийн маргааны улмаас хутгалж, амь насыг нь хохироожээ. Мөн 1 дүгээр сарын 1 ний өглөө Хэрлэн сумын 8 дугаар багийн нутаг дэвсгэрт иргэн А өөрийгөө боомилж нас барсан хэргийг эрүүгийн хэрэг үүсгэн шалгаж байна.

Он солигдохын өмнөхөн буюу 12 дугаар сарын 30 ны орой  Дорнод аймгийн Баян-Уул суманд Б-г нөхөр болох Ө нь гэр бүлийн маргааны улмаас хоёр удаа хутгалж, амь насыг нь хохироосон хэрэг гарлаа.

Өнгөрсөн сарын 16-18-ны өдрүүдэд Улаанбаатар хотноо болсон Монголын багш нарын “Оны шилдэг илтгэл шалгаруулах” эрдэм шинжилгээний бага хуралд Хэрлэн сумын 12 дугаар цэцэрлэгийн хамт олон амжилттай оролцоод иржээ. Улсын хэмжээний энэхүү илтгэлийн уралдаанд 12-р цэцэрлэгийн багш Х.Нарантуяа, Н.Дондог нар “Цэцэрлэгийн насны хүүхдийн хэл яриаг хөгжүүлэхэд тулгуур дохионы аргыг хэрэглэх нь” хамтын бүтээлээрээ оролцон дэд байранд шалгарчээ. Боловсролын хүрээлэнгээс уламжлал болгон зохион байгуулдаг тус бага хурал энэ жил “Ээлжит хичээлийн технологийн шинэчлэлийн асуудалд” сэдвийн дор болсон байна. Тус эрдэм шинжилгээний бага хуралд бүх аймаг дүүргээс багш нар оролцож 27 илтгэлийг хэлэлцжээ

ДОРНОД” СОНИН ТАВ ДАХЬ УДААГАА УЛСАД ШАЛГАРЛАА

Нийгэм, улс төр мэдээллийн долоо хоног тутмын “Дорнод”  сонин тав дахь удаагаа улсад шалгарлаа. Жил бүрийн оны босгон дээр Монголын Сэтгүүлчдийн Нэгдсэн Эвлэл шилдгүүдээ тодруулдаг уламжлалтай. Өнгөрөгч оны 12 дугаар сарын 29 нд болсон “Сэтгүүлч-2009” шинэ жилийн цэнгүүн дээр шагнал гардуулах ёслол болж, шилдэг сэтгүүлч, өдөр тутмын шилдэг сонин, оны шилдэг телевиз, радио, орон нутгийн шилдэг сонин гэхчлэн 15 номинациар шилдгүүдээ тодруулсан.

“Дорнод” сонины хувьд орон нутгийн ард иргэдэд үнэн зөв, бодитой, тэнцвэртэй мэдээлэл өгөх үүргээ нэр төртэй биелүүлж, зөвхөн шударга үнэний индэр болж чадсанаараа сайшаагдсан юм.

Манай сонин үүсэн байгуулагдсанаасаа хойшхи долоон жилийн хугацаанд Монголын Хэвлэлийн Хүрээлэнгийн хоёр, Монголын Сэтгүүлчдийн Нэгдсэн Эвлэлийн 3 дахь удаагийн “Орон нутгийн шилдэг хэвлэл” -ээр тодорч байна. Мэргэжлийн дээд байгууллагаараа ажлаа дүгнүүлж, өнөө цагийн орон нутгийн сонины чиг хандлагыг тодорхойлж, өнгө төрх нь болж яваа гэдэгтээ бид итгэлтэй байж, ирэх он жилүүдэд амжилтаа улам бататган ажиллахаа уншигчдадаа илэрхийлье.

2010 он Та бидний хувьд амжилт ололт, ахиц дэвшлийн жил болох болтугай.

Miss Mongolia - 2009” уралдааны “Miss turism queen” өргөмжлөлт Г.МИЧИДМАА:

Монгол охид маш цоглог, өөртөө итгэлтэй

  Манжуур хотноо зохиогдсон Сайхан бүсгүй шалгаруулах 6 дугаар тэмцээний Топ – 10-т шалгарсан Г.Мичидмаатай уулзаж ярилцлаа.

- Юуны өмнө танд нийт уншигчдынхаа өмнөөс баяр хүргэе.

2010.01.07 №01 (273) “ДОРНОД” сонин  

Аймгийн Статистикийн хэлтсийн дарга Д.Энхбаатар:

ХҮн ам, орон сууцны 2010 оны ээлжит тооллого хойшлогдлоо

- Энэ оны эхээр болох ёстой байсан хүн ам орон сууцны тооллого ямар шалтгаанаар хойшилсон бэ?

- Арван жилд нэг удаа явагддаг хүн ам орон сууцны тооллого энэ сарын 10-ны өдрөөс долоо хоногийн хугацаанд явагдах байлаа. Гэтэл хүний томуугийн H1N1 вирусийн халдвар тархсантай холбоотойгоор хойшлогдож энэ оны 11 дүгээр сарын 11-ний өдөр орон даяар явагдахаар болсон. Баруун аймгуудаар цас их унаснаас зарим газраар машин унаа явах боломжгүй болсон байна лээ. Өвөлжилт хүндэрснээр малчид хол оторлосон учраас тооллогод шаардагдсан төсөв хөрөнгө хүрэхгүй болсон нь ч үүнд нөлөөлсөн. Энэ хоёр шалтгаан хойшлогдох үндсэн шалтгаан болсон.